Golden Chain

Hazrat Syed Mir Muhammad Ismail Wasiti Sahib ki Sarkar Bansah se bay’at ka waqi’a ajeeb o ghareeb hai. Sahib-e-Nazm Ahl-e-Aali raqam taraaz hain:

Syed Mir Muhammad Ismail Wasiti Quddisa Sirruhu ba-kamaal awliya-e-kiraam mein se hain, jinke khawaariq-e-‘adaat numayan aur karamatain roshan hain. Ibtida mein apne sage maamoon Hafiz Syed Muhammadi jese Wali Kaamil ki sohbat mein rahe aur unke faqr ki chashni se lutf andoz ho kar, anfa’an-e-shabaab mein hi murshid ki talash mein sargardan rahete. Aakhir kaar Shah Abdul Razzaq Bansawi Quddisa Sirruhu ke feyzan-e-wilayat ka shehra sun kar Bansah haazir hue aur aik arsay tak Sheikh Moosof ki khidmat mein zindagi basar karte rahe.

Ek din Hazrat Sayyidina Shah Abdul Razzaq Quddisa Sirruhu zameen par chadar taan kar, bazahir mahmoostirahat hue. Syed Mir Muhammad Ismail Wasiti Sahib ne aakar khidmat shuru kar di. Hazrat Sayyidina Shah Abdul Razzaq Sahib is waqt azkaar-e-ba’tini mein mashghool the. Chadar sar se sarkayi aur naaraaz ho kar farmaya: “Jao! Na khud kuch karte ho, na doosray ko karne dete ho.” Hazrat Mir Sahib Shah Abdul Razzaq Sahib se bad-dil ho kar uth gaye aur nihayat ranjida ho kar wahan se chalay jane ka irada kar liya. Idhar Shah Abdul Razzaq Sahib ko Ameer-ul-Mu’mineen, Mawla-ul-Muslimeen, Imaam-ul-Awliya, Waris-e-Wilayat Muhammadi Sayyidna Ali Murtaza Karam Allahu Ta’ala Wajhahu-l-Kareem ki khawab mein ziarat hui. Shah Abdul Razzaq niyaaz manda nahazir hue. Hazrat Wilayat Ma’ab ne rukh pher liya. Shah Sahib is jaanib haazir ho gaye to Hazrat Mula-e-Kainaat ne naaraaz lab o lehje mein farmaya: “Mera beta tumhare paas taleem-e-baatin ke liye haazir hua aur tum ne usay daant kar apne paas se bhaga diya aur taleem nahi di. Jao! Usey bay’at karo aur uski taleem-e-baatin mein mashghool ho jao.” Shah Abdul Razzaq is

soorat-e-haal se bohot haraasaan hue aur foran larzaan o tarsaal Syed Mir Muhammad Ismail Wasiti Sahib ki talash mein rawana ho gaye.

Idhar Syed Mir Muhammad Ismail Wasiti is be-ittifaaty ki soorat-e-haal se had-dardja ranjida the. Un par khawab ki kaifiyat taari hui to kya dekhte hain ke Hazrat Ameer-ul-Mu’mineen Ali Murtaza Razi Allahu Ta’ala Anhu tashreef laaye aur god mein le kar apni bay’at ke sharaf se sarfaraaz farmaaya aur aasteen-e-mubarak se sheerni ke paanch ladoo nikaal kar ataa kiye.

Syed Mir Muhammad Ismail Wasiti Sahib khawab se bedaar hue to hadd-dardja masroor the aur usi aalam-e-masarrat mein dobaara mehwo khawab ho gaye. Shah Abdul Razzaq Sahib girte padhte Mir Sahib ke paas pohanchay aur qadamoon par gir kar farmaya: “Uthiye! Aap so rahe hain aur meri tamaam umar ki mehnat barbaad ho gayi. Uthiye, bay’at kijiye aur mere saath aaiye.” Mir Sahib aalam-e-khawab mein Hazrat Mula-e-Kainaat se bay’at kar chuke the, is liye Shah Sahib maaliya se bay’at hone mein unhein tamall ho gaya. Shah Sahib ne farmaya: “Main jaanta hoon ke aap ne khawab mein apne judd-e-amjad se bay’at kar li hai magar meri zahiri bay’at bhi zaroori hai.” Phir Hazrat Shah Abdul Razzaq Sahib ne Mir Sahib ko mureed kar liya aur Mula-e-Kainaat ki ataa ki hui sheerni aasteen se nikaal kar Mir Sahib ke haath par rakh di aur farmaya: “Haath aik hai. Kabhi is toor par zaahir hota hai aur kabhi is toor se.” Phir Mir Sahib ko apne saath Bansah le gaye aur bohot hi tawajjo aur shafqat ke saath baatni taleem di, yahaan tak ke is maqam-e-wilayat kubra par pohnchadeya jise maqam-e-kalliyat kehte hain aur apni khilafat se nawaza. Poori zindagi Hazrat Mir Sahib ko sirf Syed Aali Nasab ke laqab se yaad farmaate, kisi aur lafz se nahi. Aakhir kaar Syed Mir Muhammad Ismail Wasiti Sahib ne apne murshid ke watan Bansah se qareeb moza Masauli mein iqamat ikhtiyar kar li. Aksar o bisar apne murshid Shah Abdul Razzaq Sahib ki qadam bosi ke liye Bansah haazir hote the. Shah Abdul Razzaq Sahib pehle hi haazireen ko mutala’a farma dete ke Syed Aali Nasab aa rahe hain. Jis waqt Mir Sahib aap ki khidmat mein haazir hote, aap unki tazeem ke liye sarw-qad khade ho jaate, apne paas jagah dete aur poori tawajjo aur ikraam se pesh aate. 

Nizam-ul-Laali Qalmi [Daaira Qadriya Bilgram Shareef Safah 118-120]

Kahte hain ke dono buzurgon ki mulaqat Hazrat Mahmood Shaheed Rahmatullahi Ta’ala Alayh ke mazar-e-paak (qareeb Shahab Pur Zila Bara Banki jo Bahraych Road par waqay hai) ke paas hui

Thi aur usi waqt Hazrat Sarkar Bansah ne Sarkar Masauli ko daakhil silsila farma kar jumla salasel mubarakah ki ijazat aur khilafat ataa farmaayi aur saare awraad o waza’if, azkaar o asghaal, musafahaat aur baatni fuyooz o barakaat ki taleem di. Khirqah mubarakah aur kalaah mubarakah Mula-e-Kainaat Hazrat Ali Karam Allahu Wajhahu ataa farmaayi jo aap ke Sheikh-e-Tariqat Taj-ul-Aarifeen, Badr-ul-Kaamilin Hazrat Syed Shah Mir Abdul Samad Khuda Nama Qadri Ahmad Abadi Gujrati Razi Allahu Ta’ala Anhu ne ataa farmaayi thi.